【明報專訊】恒生銀行（0011）噚日傍晚舉行90周年酒會，恒生就係喺90年前嘅噚日，亦即係1933年3月3日成立，「4條3」相當好意頭。酒會主禮嘉賓係特首李家超，呢個酒會好可能係撤銷口罩令後特首第一次出席酒會，小琴睇電視直播見到佢唔少時候笑容滿面，仲話好開心「今日可以見到咁多靚仔靚女嘅笑容」。
李家超話恒生對佢嚟講喺細細個時已係佢嘅街坊銀行，記得屋企有乜問題到恒生分行排隊，職員會好有心機咁問佢有乜需要，確保佢冇排錯隊。特首仲話反映呢間銀行有愛心好照顧街坊。
銀行新Slogan「恒變生無限」
恒生嘅酒會搵來廿多位靚女、型男Model行Catwalk，展示咁多年來嘅制服。同時展示新Slogan「恒變生無限」，寓意係恒生用心服務香港90年，一直以變應變，成就無限可能，仲搵來炙手可熱導演陳詠燊、乒壇一眾港隊代表、「風之后」李麗珊等在新宣傳片中粉墨登場，大家稍後可能會不時睇到。