「處理恒大危機」許家印缺席兩會

【明報專訊】恒大（3333）陷入財困多時，集團主席許家印已經冇公開蒲頭多時，近日兩會喺北京召開，身為全國政協常委之一嘅佢竟缺席。彭博引述知情人士就話，因為佢要處理恒大嘅危機，所以就叫佢唔使出席啦，仲話許生今次請咗事假。報道仲言之鑿鑿話，今次佢冇得出席，反映咗佢唔再係以前咁受中央重視云云。就算冇畀人踢出局，佢個人喺黨嘅地位已經滑落。恒大方面就冇回應過彭博嘅查詢。點都好，除咗許某之外，今屆政協總共有169人缺席，許生只係其中一人而知名度高嘅，難免畀人關注多啲。之但係，恒大自去年中爆出財困後消息一籮籮，到近日由燦爛歸於平淡，冇晒消息。不過，兩會佢仲唔蒲頭，行家八都冇得八，恒大最新嘅情况會點？重組計劃最終得唔得？大家只能夠繼續望天打卦靠估。