經濟

小琴密語

投資策略

馬化騰:騰訊只是普通公司隨時可被替換

【明報專訊】過去嘅2021年相信係中資科網股嘅「噩夢」,皆因國家三不五時就話要整頓。小琴噚日見到內媒話,馬化騰(圖)舊年底喺騰訊(0700)嘅員工大會上,表明「騰訊只係國家社會發展期間嘅一間普通公司仔」,只係發展浪潮下嘅受益者,並唔係啲咩基礎服務,仲話公司「隨時都可以被替換」。

網民盛讚「求生欲很強」

報道仲引述一名騰訊中級管理層話,以前科網公司之間鬥嘅係增長速度,未來鬥嘅係邊個比較穩健。馬化騰話,未來騰訊喺服務國家同社會嘅時候,「要做到不缺位、做到位、不越位,做好助手、做好連接器」。有內地網民笑馬化騰嘅求生欲好強,亦有網民話「兩馬,果然是深圳馬最智慧」、「小馬哥謙虛了,同時也說明小馬哥是清醒的」、「小馬一直不想讓國家注意他,他喜歡悶聲發大財」。嗱,馬仔呢鋪小琴就真係撐你啦!現時風頭火勢,邊個敢認第一呀?轉個頭話你壟斷市場,要行政處罰事小,再有更嚴重後果就無謂啦!

email:piano@mingpao.com

[小琴密語]

相關字詞﹕深圳 馬化騰

上 / 下一篇新聞