經濟

小琴密語

投資策略

蔡崇信12.3億購曼哈頓豪宅 美第3高紀錄

【明報專訊】月初先有消息話阿里巴巴(9988)副主席蔡崇信(圖)用阿里股權來抵押借錢,阿里發言人亦直認不諱,只係話蔡崇信的抵押水平可控。大家當時都諗Joe Tsai(蔡的英文名)到底攞錢來做乜,不足1個月已經有答案。上個禮拜專欄作家李曉佳先寫完Joe旗下基金正喺NBA大展拳腳。噚日外電CNBC又引述消息,話佢喺紐約買豪宅。報道指曼哈頓區近日成交咗一筆1.57億美元、即係成12.25億港紙的交易,背後神秘買家正係蔡崇信,呢個做價仲係美國史上第三貴的豪宅交易。

CNBC話,蔡崇信買入中央公園南220號嘅60同61樓,呢兩層居高臨下,可以俯瞰中央公園同曼哈頓市中心。另外,蔡崇信亦買咗18樓一個細單位,可能係畀員工使用。蔡崇信近年已成為布魯克林籃網隊嘅米飯班主,可能佢都覺得要喺紐約買番個豪宅,先至配得起呢隊NBA龍頭班主的地位。

[小琴密語]

上 / 下一篇新聞