【明報專訊】舊年年頭疫情風頭火勢，保誠保險一名個人保險代理居然喺微訊呼籲湖北省客戶來港「躲避一下」向佢買保險。保監局尋日出稿，話呢名前個人保險代理任煒書，被裁定干犯不當行為。保監局譴責佢之餘，仲唔准重投業界5個月。
保誠當月炒魷
保監局話，任煒書舊年1月23日透過佢社交媒體帳戶向佢通訊錄上嘅所有人發放訊息，以當時爆發新冠疫情為由，鼓勵收到訊息嘅人從湖北省來港以避開疫情同埋向佢買保險，訊息就引起公眾關注，保監局接到多宗同呢個訊息有關嘅投訴。
保監局話，任煒書喺今次事件入面違反保誠保險有關跨境銷售嘅內部政策，喺進行受規管活動時無處事持正，保監局認為佢所採取與進行受規管活動有關嘅行動，相當可能有損公眾利益。
呢單事件發生後，保誠好快「斬纜」，當月已將佢炒魷。
email:piano@mingpao.com
[小琴密語]
相關字詞﹕保誠
