經濟

小琴密語

投資策略

騰訊旗下公司限加班 網民:改屋企OT而已

【明報專訊】啲人成日話「香港人最鍾意返工」,其實唔少中資科企都一直實行「996、715、000」呢啲做死冇命賠嘅返工制度。噚日騰訊(0700)旗下光子工作室流傳出一份內部通告,講明由下星期一(14日)開始,實行「周三健康日」,即係逢星期三準時下午6點收工。其他工作日都唔可以遲過晚上9點離開公司,OT必須提前申請。

騰訊互娛相關負責人話,呢啲措施都係用嚟鼓勵員工「勞逸結合」,進一步提升工作效率,同時都更關注身心健康,留出更多時間陪吓家人。網民對於措施反應兩極,有網民讚揚騰訊做得好,其他科網企業應該學吓。不過部分網民質疑,新措施只係將OT地點改為屋企而已。

內地唔健康嘅加班文化,近年廣受社會關注,搞到有網民提出《躺平論》,覺得「與其跟隨社會期望堅持奮鬥,不如選擇『躺平』」,等自己過得輕鬆自在一啲。不過阿里巴巴(9988)創辦人馬雲之前話過,佢覺得能夠做到996(即每天朝9晚9,一周6天)。係一種巨大嘅福氣,好多公司、好多人想996都冇機會。仲叫年輕人自己要明白,幸福係奮鬥出嚟㗎!

email: piano@mingpao.com

[小琴密語]

相關字詞﹕騰訊 做死冇命賠

上 / 下一篇新聞