經濟

小琴密語

投資策略

美團王興179億元股份 注公益基金推動教育

【明報專訊】美團(3690)創辦人王興早排吟詩作對搞到小股東要食驚風散,近日又有新搞作,不過就係做善事,各位股東放心,應該冇事嘅。話說小琴噚日睇到港交所(0388)資料,發現王興簽訂咗一項股票轉讓計劃,將自己5731.9萬股美團「特權股」嘅A類股,換轉成為「普通股」嘅B類股並注入到「王興基金會」。據小琴了解,呢個基金係專門用嚟推動教育同科研等公益事業。

根據美團星期三(2日)收市價311.8元計算,今次轉移到基金會嘅股份,市值大概178.72億元。資料同時顯示,「王興基金會」當日都完成咗約935萬股嘅公益捐贈,呢批股份市值約29.15億元。美團發言人就話,今次嘅股本轉換,只係屬於高管個人出於公益目的所做嘅資產規劃,唔會對其繼續推動美團發展有任何影響。

完成轉讓之後,美團A類股份總數將會減少至6.78億股,當中王興嘅A類股份持股比例就會由77.92%,下跌至76.06%;又因為A類股份屬於每股有10股投票權嘅「特權股」,所以王興喺美團嘅投票權就由原先嘅45.02%,下跌至42.7%。

[小琴密語]

相關字詞﹕慈善 王興 美團

上 / 下一篇新聞