經濟

小琴密語

投資策略

譽宴主席言論惹抵制 彩福「割席」澄清已分家

【明報專訊】中式連鎖酒樓譽宴近日知名度大升,皆因主席張家豪早前否認「利誘」員工打針,仲講咗句「𡃁仔畀人利誘出嚟掟汽油彈就有」,言論引發社會嘩然。彩福婚宴集團噚日隨即發聲明「割席」,話早於2009年已經同譽宴分家,兩個集團獨立運作,唔存在任何合作關係。

其實何志強、何惠雄、張家豪同張家驥2000年創立彩福後,2009年因為發展方向有分歧而拆伙,何家兄弟就保留彩福品牌,現時品牌包括「彩福皇宮」、「彩福喜宴」、「彩薈軒」。

講番譽宴,早前有報道指集團以停工為由強逼員工在指定日期前打疫苗,之後又話停工只係暫時說法,將會向打針員工發放2000元獎金,主席張家豪就話唔係利誘員工打針。譽宴現時一共有4間酒樓,品牌包括「譽宴‧星海」同「星海薈」,至於上市公司譽宴集團(1483),其實上年已經賣走中式酒樓業務,亦準備改名做「網譽科技」,所以酒樓係唔關佢哋事㗎!

[小琴密語]

相關字詞﹕星海薈 張家驥 彩福婚宴 張家豪 譽宴

上 / 下一篇新聞