經濟

小琴密語

投資策略

快運賣「家檔」 網售手推餐車變現

【明報專訊】新一波變種疫情隨時殺到,航空界原本寄望疫苗復航嘅希望又凍過水。唔知係咪反正無得飛,廉航香港快運就索性賣「家檔」救亡。公司噚日喺網上公布,將客機上嘅舊手推車同手推櫃拎出嚟賣,係繼舊年頻傳財困嘅港航拎機上二手餐具出嚟賣後,第二次有航空公司拎啲二手家檔出嚟賣,真係睇到人聞者傷心,見者流淚。

網民:幾時飛機斬件賣?

今次快運喺facebook公布喺免稅商品網站賣車仔的消息,美其名係叫大家「將飛行感覺帶番屋企」,話可以將呢啲舊「架生」變成你屋企的實用儲物櫃、茶几又或者係鞋櫃等等。但實情就係賣舊嘢變現,仲話「每一架都有獨一無二嘅生產編號,記錄住佢哋一點一滴嘅飛行歷程」,情況真係令公主我非常擔心,會唔會搞搞下快運都變成歷史。

其實早兩日港航先畀內銀追數,要收返佢個香港航空飛行培訓中心。今日就到快運賣車仔,難怪啲網民都喺快運facebook留言,問快運幾時將飛機斬件賣,有啲仲話想買機師座位來打機用,都有人叫有買快運期票的人小心啲,大家真係睇路呀。

email: piano@mingpao.com

[小琴密語]

相關字詞﹕港航 二手餐具 快運 變種病毒 廉航

上 / 下一篇新聞