經濟

小琴密語

投資策略

恒大商業新聞獎 明報奪兩殊榮

【明報專訊】香港恒生大學舉辦的第五屆「恒大商業新聞獎」噚日公布得獎名單,本報奪得兩個獎項,分別係經濟版記者馬迪帆,以多篇報道包括〈實測重複認購諾誠 1人5戶中3手 自稱券商代表微信教違規〉等奪得年度新晉商業新聞記者獎,仲有地產版記者甘潔瑩同林尚民,以〈中環近2萬呎舖變身快閃店〉報道獲得最佳房地產新聞報道獎(文字組)銀獎。

〈實測重複認購諾誠〉報道喺上年3月23日刊出,當時香港新股市場氣氛熾熱,報道揭露存在多年嘅重複認購漏洞一直未有堵塞,對守規距嘅投資者造成不公。報道刊出後引來極大迴響,港交所(0388)翌年終出手,打擊日益氾濫嘅重複認購申請。評審之一嘅關則輝話,本報記者馬迪帆「發掘具公眾利益題材如新股重複認購,輔以實測印證,深入淺出,報道具影響力」。

至於〈中環近2萬呎舖變身快閃店〉報道喺上年12月14日刊登,內容關於被視為奢侈品牌集中地嘅零售核心區中環,喺疫情打擊下,多個巨舖丟吉,有巨舖業主變陣,以「低底租、高分成」形式出租,並與租客聯手打造快閃店,推出唔同主題出售特色產品或協助品牌散貨,喺疫情下盡吸中環人流。作為評審之一嘅香港地產代理商總會施明如就話,有關報道貼市,道出疫下商舖租務所受嘅嚴重衝擊。

email:piano@mingpao.com

[小琴密語]

上 / 下一篇新聞