經濟

小琴密語

投資策略

周大福預告Oppa任代言人

【明報專訊】周大福(1929)近年喺大陸發展愈嚟愈快,剛過去財年按零售值計,近九成生意都係來自中國大陸,自然肯揼本搵代言人谷銷售啦。日前周大福就喺微博神神秘秘咁上載一條「無面男神」嘅短片,雖然只得後尾枕、側面輪廓等,但一切都逃唔出網民嘅法眼,一秒認出係韓劇《愛的迫降》男主角、「眾人Oppa」玄彬,真係快過閃電。

網民認出《愛的迫降》男主角玄彬

玄彬一直係近年中國大陸TOP IDOL,2019年尾開播嘅《愛的迫降》講足成個2020年都仲係熱話,加上佢舊年承認假戲真做,認愛同劇女主角孫藝珍,令佢人氣更上層樓。喺廣告效益方面,玄彬一向「帶貨」力強,近年佢連代言埋花灑、枕頭、吸塵機械人都超級好賣,所以今次周大福呢段唔夠十秒嘅預告片亦同樣橫掃微博。

小琴睇返新世界(0017)執行副主席兼行政總裁、周大福執董鄭志剛(Adrian)都喺ig上載呢段片,就知公司對今次代言嘅重視程度啦,唔知Adrian會唔會出手請埋孫藝珍做情侶代言人呢。另外,聽講今次Oppa同周大福嘅合作仲要等到4月19日先揭曉,各位Fans小心等到頸都長埋呀。

email:piano@mingpao.com

[小琴密語]

上 / 下一篇新聞