經濟

小琴密語

投資策略

WeLab推18區儲角色遊戲 贏1.8萬現金獎

【明報專訊】舊年虛銀先後開業,現時鬥得難分難解,呢幾日WeLab Bank(匯立銀行)就推出咗一款儲角色嘅小遊戲,請咗本土插畫家「東尼電機」將香港18區形象擬人化,都好有心機。簡單啲講,每日可以登入App抽一次角色,儲齊18個就可以參與終極抽獎,大獎係現金1.8萬元。小琴即刻抽咗一次,開到沙田區代表「馬場發叔」,作為屯元天居民,又真係幾想見吓「屯門牛哥」同「元朗老婆丙」個設計。遊戲去到3月底為止,新用戶儲夠5個角色就會有50元現金獎。

容許小琴正正經經咁介紹返,將遊戲融入服務嘅玩法又叫「Gamification」(遊戲化),小琴都好高興喺本地銀行業見到呢種嘗試。其實早幾年內地支付寶已經咁玩,又畀富途帶嚟香港。唔單止內地,外國銀行更試過允許用戶連接運動App,每日行夠萬幾步,就賺到優惠息率,真正「健康」理財。希望遲啲香港銀行都可以有呢方面嘅創新啦!

email:piano@mingpao.com

[小琴密語]

相關字詞﹕匯立銀行 虛擬銀行 小琴

上 / 下一篇新聞