經濟

小琴密語

投資策略

李小加傳加盟HKbitEX 報道一日即下架

【明報專訊】港交所(0388)前行政總裁李小加卸任都未夠一個禮拜,市場已經流傳佢有新去向。話說內地《證券時報》周三晚報道,李小加有可能會加盟香港數字資產交易所(HKbitEX),到第二朝即係噚日成個中環都問緊呢單嘢,不過呢,獨家報道呢個消息嘅《證券時報》其後就刪除咗有關報道。

話小琴馬後炮都要講,呢個消息聽落唔係好可靠,話晒小加都係打通中港兩地股市嘅「水利工程師」,小道消息甚至話佢港股通一役功高蓋「主」(當然係香港嗰個),拎住份咁靚嘅CV,小加自己臨別贈言又話明想繼續be water——利用佢喺港交所學到嘅「水利知識」為香港同國家服務,如果最終落腳點係HKbitEX,好似唔係好夠型囉!

之所以大家都半信半疑,一來香港𠵱家奇事天天都多,而且呢間HKbitEx,係由多名港交所前高層創辦,小加嘅愛將、港交所前上市審查組聯席主管史琳亦都喺舊年9月加盟呢檔嘢,確係有啲幻想空間。不過隨住有內地傳媒轉載HKbitEX創辦人高寒嘅社交媒體發文,話「近期媒體不實報道,純屬無中生有」,大家都係努力打聽吓小加情歸何處吧!

[小琴密語]

上 / 下一篇新聞