經濟

小琴密語

投資策略

缺席真人騷 馬雲失蹤了?

【明報專訊】自從舊年螞蟻集團上市「撻Q」之後,小琴成日喺財經新聞見到阿里巴巴(9988),但就再無喺公眾場合見過創辦人馬雲嘅身影,好似「人間蒸發」咗咁。最近就有報道話,中央曾經建議馬雲留喺內地。

馬雲動向惹關注,皆因英國《金融時報》日前爆出,馬雲缺席自創真人騷Africa's Business Heroes嘅錄製,引起各地網民猜測。節目更喺官網嘅評審團隊入面,刪除咗馬雲嘅相;而原定嘅決賽評判席位,則由阿里高管彭蕾代替。

阿里發言人回應話,因為馬雲嘅日程安排上有衝突,所以今年嘅決賽就出席唔到喇!又係嘅,馬雲畀金融監管部門約談,忙住整頓旗下公司。不過,早幾年有好多中國富豪,因為內地反腐運動而失蹤,要講啲有利政府嘅評論先可以再出現;到底馬雲幾時會再次現身呢?小琴已經開始掛住佢了。

email:piano@mingpao.com

[小琴密語]

上 / 下一篇新聞