經濟

小琴密語

投資策略

港股十年市值「幾翻身」 李小加卸任身家暴漲

【明報專訊】正所謂無官一身輕,李小加噚日正式卸任港交所(0388)行政總裁,一向對佢意見多多嘅金融服務界立法會議員張華峰都喺臉書貼文同佢道別,小琴就計過,由小加上任至卸任,港交所股價升咗接近兩倍,最新市值5388億,港股市值就更加升到接近28萬億元,難怪連「肥老闆」張華峰都話小加在任期間,港交所表現的確「無乜可以挑剔」。

小加喺2010年1月16日上任,港交所喺前一日股價係146.7元,用噚日收市價425蚊計,足足升咗189.7%,肥老闆都話,港股可以話係「十年市值幾翻身」,去到2020年11月底,總市值已達到45.6萬億,比起小加上任前升咗27.9萬億;大市日均成交亦由當年每日平均不足700億元,發展至近月達1600億,作為股東真係無乜可以挑剔。

之不過小加都唔係無得著,資料顯示佢持有約50萬股港交所股份,市值超過2.1億元;再加上佢過去兩年年薪都超過2000萬元,同埋2019年底賣咗65萬股港交所套現1.67億,可見港交所都為佢帶來不少財富。

email:piano@mingpao.com

[小琴密語]

相關字詞﹕張華峰 港交所 李小加

上 / 下一篇新聞