經濟

小琴密語

投資策略

潤啤補鑊 唔夠春江鴨快手

【明報專訊】近年上市公司唔小心敏感消息偷步發放的情况屢見不鮮,今次就輪到華潤啤酒(0291)。集團噚日中午刊發公告,指附屬公司喺本月18日舉行渠道伙伴大會,會上唔小心經線上影視平台愛奇藝及網易直播,將華潤雪花今年首9個月淨利潤38.3億人民幣,同埋其中次高檔次或以上啤酒銷量按年增長7%嘅消息傳出去,所以為公平起見,就補刊內幕消息。

由於呢啲屬於財務信息,公司知道唔小心發布後,已採取措施,阻止相關財務信息喺網上影片平台傳播,但睇嚟春江鴨已經一早偷步進場啦!事關潤啤本周嘅交易量,周一至周三(16至18日)都得五六百萬股,但周四(19日)交易量突然飈至1305萬股,足足多咗一倍,噚日更升到近1756萬股成交。至於股價,周四升4%破頂,噚日早市都無咩異動,但潤啤呢張通告一出,午市股價就彈上,曾經高見59.65元,又創新高,尾市都仲有2.62%升幅,收報58.85元。

email:piano@mingpao.com

[小琴密語]

上 / 下一篇新聞