經濟

湯文亮 敢說反話

投資策略

湯文亮:移民前 一定要聽移民講座

【明報專訊】有老友話香港被美國標籤為難民城市,而且是最低層,與古巴、伊拉克、委內瑞拉同級數,現在應該趁其他國家未落閘就要去搞移民,否則蘇州過後冇艇搭,况且現在有很多移民公司,仲經常有移民講座,一定可以幫到手。老友坐言起行,在未聽移民講座之前,就已經通知物業代理話打算出售手上物業。

透露移民賣樓 物業代理會大力鋤價

老友老婆知道之後嚇到暈咗,問我有冇辦法令到佢老公唔搞移民,辦法當然有,不過一定要由佢親自出馬,首先當有物業代理睇樓,一定要表示你們打算移民,物業代理知道之後,一定會鋤價,而且仲係鋤得好深嗰隻,如果老友唔捨得賣,就未必會移民,如果唔賣樓不能算真正移民,只可以說是移居。

老友老婆話我有冇搞錯,我曾經講過,就算因為移民而要賣樓,都唔好講畀物業代理知道,否則一定會被鋤價,我當然冇搞錯,現在她是不想移民,所以就要反其道而行,一定要講畀物業代理知道。

香港專業人士 在外地要由低做起

我提醒老友老婆,在搞移民之前,一定要同佢老公去聽移民講座,那些講解員除了會講目的國家的美麗風景線之外,一定會講在那裏怎樣可以搵食?很多香港的專業在彼邦又不是那麼吃香,就算做都要從低做起,做醫護就要由做執屍開始,移民的專業人士要有心理準備,最安全方法就是要有一門手藝,學下做燒臘、叉燒包、整水喉,做開鎖佬都唔錯,收入比很多專業人士還要高,老友連煲水都唔識,叫佢做燒臘、開鎖佬,真的是開玩笑。

所以,一定要老友參加多些講座,多些了解其他國家民情,就會發覺香港並不是難民城市,美國給予香港這個稱號是有其政治目的,為了美國的政治目的而移民似乎不值。

紀惠集團行政總裁

[湯文亮 敢說反話]

上 / 下一篇新聞