經濟

小琴密語

投資策略

下一篇
上一篇

「李嘉誠基金會」撤申曹忠破產

【明報專訊】長和系創辦人李嘉誠一向非常低調,早前佢旗下嘅「李嘉誠基金會」罕有咁高調追五龍系主席曹忠數,仲提出埋破產申請,引起市場關注。不過,唔知係唔係曹忠喺被公開追數後已乖乖還錢?五龍系噚日公布,曹忠早前被李嘉誠基金會提出破產申請後,最新喺今年1月8日已獲撤回上述破產呈請。

曹忠成為罕有被「超人」追數嘅人,不過原來佢以往被指與李嘉誠私交甚篤。據傳媒報道,曹忠喺2001年曾受命掌舵首鋼香港,擔任首長系4間上市公司高層,帶領公司脫離金融風暴後困境,並因此同李嘉誠結緣。曹在任期間,李嘉誠曾對首長系大舉注資超過10億元,亦頗為賞識曹。

隨後曹忠離開首鋼,建立中聚電池,後改名五龍,「超人」亦曾捧場大手買入,但唔到一年即淡出。今次李嘉誠同曹忠由友好到申請對方破產,據基金會喺去年9月發聲明指出,由於曹忠為中國資源交通(0269)擔保發行嘅債券,由2016年違約至去年7月,合共結欠基金會本金連利息約11.2億元,因此向法庭入稟申請曹忠破產。

[小琴密語]

上 / 下一篇新聞