經濟

小琴密語

投資策略

下一篇
上一篇

翠華「出椒」惹人代出招 公司澄清無影射警察

【明報專訊】噚日網上有人流傳翠華(1314)嘅調味料包裝似乎影射警察做卡通狗,而且胡椒粉印有「出椒」字眼,一班撐警人士當然好嬲,包括港區全國人大代表吳秋北同前新聞統籌專員馮煒光都在facebook發炮,電影導演王晶都喺微博叫大家廣傳出去,唔好再幫襯翠華。公司噚日就即刻澄清早喺2015年已推出包裝,冇任何影射意味,有人刻意抹黑公司,破壞集團聲譽,會保留法律追究權利。

侍應稱「出椒」已經派晒

小琴噚日晏晝就去咗尖沙嘴一間翠華食下午茶,見到包裝印有「下一代 睇我哋」嘅白糖同咖啡糖仲係任拎,不過胡椒粉就冇放枱面。當記者問侍應有冇胡椒粉,佢就話「已經派晒」,至於胡椒粉有冇「出椒」包裝,佢就笑咗一笑,叫小琴問番顧客服務部,佢就答唔到喇。

根據翠華嘅介紹,其實2個卡通並唔係狗仔,而係「奶油豬卡通圖案」,分別叫做「外賣仔」同「蟲見飛」,擺出萬佛朝宗「pose」嘅卡通公仔名為蟲見飛,興趣包括大叫同埋練武,不禁令小琴諗起近日每晚10點就會大叫口號嘅朋友仔。

[小琴密語]

相關字詞﹕胡椒粉 撐警 翠華 連登

上 / 下一篇新聞