經濟

小琴密語

投資策略

下一篇
上一篇

七成「三文治世代」願助子女上車

【明報專訊】今時今日做人父母真係唔容易,小朋友除了要贏在「起跑線」,仲有一條「上車線」。投資者及理財教育委員會噚日發布一項關於「三文治世代」理財行為調查,發現有七成受訪者都願意為仔女買樓。「三文治世代」係指一班「上有高堂,下有仔女」嘅夾心一族,佢哋最大財政壓力源自仔女教育,調查話家長每個月平均都要支付3210元畀仔女參加課外活動,絕非一筆小數目。

投委會總經理李博衛提醒家長,雖然為仔女提供財政支持係出於善意,但都要同時衡量自己未來及退休後嘅需要,相比起金錢資產,家長其實更應該將正確嘅理財知識同價值觀傳承畀下一代。

由今個星期六起,投委會將會喺鑽石山荷里活廣場舉辦「時光倒流打工仔」活動,適合4至10歲小朋友參加,現場設有懷舊小店,一班小朋友可以扮吓「打工仔」,從遊戲中學識基本理財概念。

[小琴密語]

上 / 下一篇新聞