經濟

小琴密語

投資策略

下一篇
上一篇

國泰塑新形象「MOVE BEYOND」

【明報專訊】之前神神秘秘話噚日有神秘活動嘅國泰(0293),原來係要同大家宣布公司推出新口號「志在飛躍(MOVE BEYOND)」。行政總裁何杲話,現時航空業界競爭環境有唔少改變,亦有唔少新機會,認為國泰係時候開啟新一章,所以藉住全新口號去重塑企業品牌形象。

今次國泰不單會投放電視、報刊廣告同巴士車身廣告,宣傳片仲搵來香港單車運動員李慧詩、本地樂隊Supper Moment坐鎮。國泰航空顧客及商務總裁盧家培引用李慧詩所講,無論過去輸贏多少,跌倒多少,最重要係不斷求進,呢個就係國泰新口號嘅精神。

除咗全球宣傳活動,國泰接下來仲有唔少「MOVE BEYOND」,包括繼續引入嶄新機隊。下個月更加會推出新嘅颱風應變系統,當有機會打風導致航班延誤甚至取消,系統會提早協調同聯絡受影響乘客,新系統最快可以於1至2小時內處理好聯絡工作,比過去人手須時一兩日大大縮短。

不過盧家培千叮萬囑,乘客經國泰訂票一定要留聯絡電話,否則就算系統想通知都冇辦法。

[小琴密語]

相關字詞﹕新口號 move beyond 志在飛躍 國泰

上 / 下一篇新聞