【明報專訊】時裝品牌ESPRIT母公司思捷（0330）上星期公布新一輪「重組計劃」，先計劃裁走全球近四成非前線員工，再委任Tommy Hilfiger前高層Mia Ouakim做產品及品牌總裁，咁到底品牌點轉型呢？思捷主席柯清輝（圖左）話你知，就係「made in China」！
柯清輝噚日出席完股東會後話，公司會畀心機提高產品質素，定位會「聽取忠實客戶聲音」；不過之後就話歐洲客就鍾意基本款「冇咁fashionable」，但針對中國客人就要「產品本地化」，所以已經請咗一位產品設計師長駐上海，目標係中國以至亞洲有30%產品由本地設計及製造，小琴真係唔係好sure，中國客愛「made in china」多過外國牌子？查實近10年思捷已經傷盡好多小股東心，小股東陳先生就話，自己由思捷股價40幾蚊揸到𠵱家，中間經歷供股都冇沽貨；咁佢覺得思捷今次轉型計劃點？兩個字：「離譜！」
email:piano@mingpao.com
[小琴密語]