【明報專訊】香港藝術館同中大文物館聯合籌劃嘅「香江藏珍──香港三大古書畫收藏」展覽今日起喺香港藝術館舉行，展覽首次破天荒同場結集「虛白齋」、「至樂樓」及「北山堂」三大古書畫收藏嘅瑰寶，展出93組由唐代至清代嘅經典書畫，包括董其昌嘅《山水行書合冊》同黃道周嘅《松石圖》，免費入場。
展覽舉行至10月7號，展品之一有文徵明嘅《行書寄金陵友人詞》，作品係文氏少見以王羲之風格書寫嘅大字行書立軸，亦係北山堂首件捐畀中大文物館嘅書法，同時係北山堂同文物館尺幅最大嘅書法立軸收藏，有348×103厘米咁大。
現場仲有當代作品——由香港藝術家邱榮豐創作嘅兩組藝術裝置《迴渡》及《蜃曲》，受明末清初畫家黃向堅《尋親圖》系列啟發，當中《迴渡》為一組環形山水裝置，透過青綠山水同白描線條，延伸黃一系列原畫中嘅山水空間想像。
展覽除咗有多款書畫，今個月14號至下月12號期間仲有10場國際學術講座系列，由香港藝術館長（至樂樓）劉湘瀅主講嘅「香港二十世紀的書畫收藏活動」講座打頭陣，將以虛白齋及至樂樓藏品為例，訴說香港書畫收藏故事。