【明報專訊】《港區國安法》實施近5年，《維護國家安全條例》生效1年多，香港電台最新製作嘅節目《國安法事件簿III》就會講述國安法最新實施情况、《國安條例》重點條文，今季並增設學生討論環節，了解年輕人對國家安全同相關法律嘅想法。
節目下周一開始一連7日喺港台第一台、港台電視31播出。港台噚日舉行節目啟播禮，播放節目精華片段，首集嘉賓保安局長鄧炳強噚日喺活動上話，有假新聞、假消息包裝成一般社會議題，其實係挑動市民對特區政府甚至中央政府嘅不滿，例如《國安條例》立法時有媒體報道不可再用社交媒體，但並非事實，提醒市民要了解消息來源係咪可信，同埋聆聽政府解釋及澄清。
另一節目嘉賓政務司長陳國基話，國家安全係香港繁榮安定嘅先決條件，又認為每個市民都有責任維護國家安全。佢向參與拍攝嘅學生代表送上紀念盆栽，寓意國家安全意識嘅種子喺青年心中萌芽並茁壯成長。