【明報專訊】房委會噚日召開周年特別會議，7名委員輪流發言，重點之一係創科點樣加快建屋、減省成本。正當其他委員講緊機械人髹牆幾快、無人機點樣協助外牆檢測，曾任教大校長嘅委員張仁良就分享，以前學校IT部成日話買新嘢可減成本，點知成本仲貴咗，提醒「畫餅」時要小心考量。
張仁良噚日喺會上就開源節流提建議，包括直接向製造商採購物料、重推出售公屋等。當講到應用創科降低成本，佢忽然醒起「提一提」大家，話以前做校長，IT部成日都話買新設備減省成本，點知買完成本無減到，「仲要加多幾個人睇住嚿新嘢」。張仁良話創科的確要「畫餅」批資源，但「畫」嘅時候要小心。
另外，委員之一嘅工聯會議員陸頌雄就提議公屋引入公用客廳，有多啲公共空間方便住客一齊煮飯、聯誼，重建守望相助社區。身兼房委會主席嘅房屋局長何永賢聽完就話陸嘅發言「好有溫暖感、幸福感」，分享自己喺添馬嘅辦公室，牆上都貼咗大大個「家」字，以提醒施政時應為萬千家庭幸福着想。
