【明報專訊】政府建議將籃球博彩合法化，民青局長麥美娟噚日透露，當局將就籃球博彩建議向馬會發牌。對於點解唔考慮其他機構，麥美娟話因為政府唔鼓勵賭博，合法賭博途徑要有限度，「我哋唔會好似有啲人講，係咪應該搵好多人出嚟做？咁樣你會變咗炒熱，係炒熱賭風」。
當局擬修訂《博彩稅條例》將籃球博彩合法化，麥美娟接受商台《政好星期天》訪問，重申政府唔鼓勵賭博。佢話近年平和基金4個輔導中心嘅求助數字平穩，年輕人到馬會開設投注戶口比例維持喺1%至2%，但當局仍然重視青年賭博問題，將加強相關工作，初步構思由平和基金增設一個針對青年教育嘅輔導中心。另外佢話會研究要求馬會提供資源協助推廣體育。
當局建議籃球博彩稅訂於50%，麥美娟於節目後被問到點解唔調高稅率，佢解釋政府並非為增加稅收，而係要打擊非常猖獗嘅非法籃球賭博活動。佢話當局釐定稅率時考慮咗唔同因素，包括點樣將非法賭博嘅錢導入規範嘅渠道。
