【明報專訊】「全城防騙你至叻，識搵提子做老best，用埋防騙視伏App，趕絕騙案go ahead。」警方近年大力宣傳防騙，小朋友都認識嘅吉祥物「提子」原來到6月10日已5歲。警方為隆重其事，噚日喺金鐘夏慤花園舉辦「提子五歲防騙生日派對」，現場有畀小朋友玩嘅提防騙子急口令大賽，以四句易記嘅急口令加強市民防騙意識。
出席生日會嘅警務處長周一鳴話，騙案好似病毒，警方嘅防騙宣傳好比疫苗，市民主動接收防騙資訊就如接種疫苗嘅過程，認為只要大家齊心協力先會令騙徒無機可乘。佢回顧「提子」嘅誕生，話2020年正值新冠疫情嚴峻時期，市民居家抗疫致網上騙案激增，當時騙案數字按年增加近九成。一哥話，到咗2024年騙案升幅已顯著放緩至11.7%；今年首4個月，詐騙案數字雖較去年同期升9%，但損失額比去年同期下跌三成，認為不厭其煩嘅提醒有助加強市民防騙意識，話「提子」今後仍會繼續努力宣傳「提防騙子」。