【明報專訊】一連兩日嘅香港國際龍舟邀請賽噚日閉幕，賽事吸引多名健兒參賽，朝早仲有「美少女戰士」、「埃及法老」出戰「扮嘢大賽」，唔少人見到一班高大威猛嘅美少女戰士，都忍唔住要同佢哋「打卡」。賽事最終由一眾化身成「孫悟空」及「哪吒」嘅港鐵龍舟隊勝出。
「濟公」鬥「埃及法老」
今屆邀請賽設19項賽事，吸引逾190隊來自12個國家及地區隊伍逾4500名健兒參賽，「扮嘢大賽」共有9隊龍舟隊參加，賽事採海上巡遊形式，以各隊伍嘅完成時間、服裝造型，以及團隊精神為評分標準，結果由評審團及觀眾投票決定。除咗美少女戰士隊伍，有隊伍戴上鵝及鯊魚頭套，有「濟公」同「埃及法老」同場競技，結果由美猴王孫悟空率領猴子猴孫同一眾哪吒合力勝出。
消防體福會贏紀律部隊賽
邀請賽設19項賽事，其中永明公開錦標賽由西區龍體育會奪冠。今屆新增紀律部隊及中學組賽事，香港消防處體育福利會龍舟隊奪得紀律部隊錦標賽冠軍，香港航海學校就奪得中學組冠軍。