【明報專訊】民青局噚日舉辦區議員培訓講座，分享傳媒生態並教導應對媒體技巧。據了解，政府邀請咗資深傳媒人盧永雄擔任主講嘉賓，提到「設定議題」嘅技巧，教區議員如何有效傳遞信息，亦提醒小心避免「講錯嘢」，有時寧可做「錄音機」。
培訓講座分為兩部分，第一部分關於傳媒生態及應對媒體技巧，第二部分介紹《2024年建築物管理（修訂）條例》內容及規定。多名區議員同Emily講，培訓內容要保密，據悉講座兩節各長一個多小時。
民青局長麥美娟出席第二部分講座時，寄語區議員加強與地區三會同關愛隊合作，處理市民之間嘅矛盾糾紛，於萌芽階段解決問題。民青局發稿話期望培訓後區議員加強與傳媒溝通，透過媒體畀公眾了解佢哋嘅工作，擔當政府與市民之間嘅橋樑，「說好區議會故事」。
