【明報專訊】「全城防騙你至叻，識搵提子做老best。用埋防騙視伏App，趕絕騙案go ahead！」警方防騙吉祥物「提子」「誕生」近5年，警方之前推出呢個「防騙急口令」，嚟緊星期日（8日）喺金鐘搞嘅防騙生日派對會擺下「提子急口令擂台」，市民可以即場挑戰急口令，有機會贏走限量版提子紀念品。
警方上周六（5月31日）起推出呢個「防騙急口令」，市民4秒內讀完，再按要求上傳社交平台，亦可以喺周日下晝去生日會換取提子盲盒紀念品。
「提子」2020年6月亮相，警方期望將防騙資訊帶入屋，幫市民同身邊親友提高防騙及求助意識。警方周日會喺金鐘夏慤花園「提子公園」舉行防騙生日派對，除咗26組提子藝術裝置外，另設生日派對限定版提子打卡裝置及提子人偶快閃，畀參與者「打卡」。警方亦準備防騙互動環節及提防騙子遊戲，期望提升大眾對騙案嘅「抵抗力」。
翻查撲滅罪行委員會數字，本港今年首4個月錄得超過2.8萬宗罪案，較去年同期跌2.2%，其中詐騙案有逾1.3萬宗，較去年同期升9%，佔整體罪案約47%，涉案金額較去年同期跌約30%。