【明報專訊】曾經喺深水埗街頭搞「激光劍比賽」嘅民政事務專員（DO）黃昕然，早前已經升職，出任民政及青年事務局副秘書長（民政事務），其職位由隔籬區嘅油尖旺民政專員余健強兼任；轉眼大約一個月，政府宣布由文化體育及旅遊局高級政務主任（旅遊）王浩宇（圖）接任做深水埗民政專員。
王浩宇嘅任期由今個月20日開始，佢2015年加入政府政務職系，曾喺前民政事務局、財經事務及庫務局工作。
2020年開始做民政專員嘅黃昕然，升職後都係負責民政事務，主要處理與宗教團體相關政策、賭博相關政策及發牌、監督學校以外推廣公民教育等。
之前有報道引述政圈人士估計，由於年底舉行立法會選舉，由資深民政專員續任民政專員會好啲，所以寧願兼任，不過據Emily了解，近年政府鬧AO（政務主任）荒，唔少部門有AO調職或離任，往往要等一段時間，所以「兼任」、「署任」嘅過渡安排不時出現。