【明報專訊】天文台前台長林超英喺酷熱天氣下仍然唔開冷氣，佢日前發文話，今年除咗孫女喺佢屋企嗰3、4日而氣溫甚高，先至會開冷氣，溫度調校至27℃；佢噚日喺社交媒體發文，引述一名網友Theo於2024年開始，改用一級能源標籤冷氣機，將溫度調校至27℃，再加一把風扇製造氣流，結果耗電量大幅下降。
兩年慳電費66% 林：有氣流 相當舒服
林超英話，網友Theo前日畀佢睇近3年5月嘅電費單，由2023年用電438度，逐步減至去年嘅203度，以及今年5月嘅149度，減幅約66%。佢話實驗證明，將冷氣溫度調校至27℃，加上氣流，其實相當舒服，慳電效果十分顯著。
翻查環保署網頁，建議將冷氣溫度調校至25.5℃，林超英分享嘅做法較環保署更進取。林超英話，可以唔開冷氣當然最好，但唔少人覺得難以做到，依從Theo嘅方案都係不錯嘅選擇，既慳錢又減排，何樂而不為。唔少網民留言話同意冷氣溫度唔需要太低，但亦有人話點慳都好，電費始終係正數，點都挑戰唔到林生嘅負電費紀錄。