【明報專訊】聽日係端午節，中電總裁羅嘉進同勞福局長孫玉菡早前同200位仁愛堂嘅老友記一齊參與舊衣改造工作坊，為咗應節，仲一齊學「包糭」——將舊牛仔褲改造成一個個糭形布袋仔。佢哋兩個都話平時好少做手作，所以要向老友記即場學師。孫玉菡話一班老友記整到咁多有創意嘅作品，係「活到老，學到老」嘅最佳寫照；羅嘉進就大讚老友記創意爆棚，令舊衫「重生」。
中電由2014年起舉辦「和您一起過節」活動，今次以升級再造為主題，舉辦咗6場舊衣改造工作坊，由中電義工收集400件舊衫褲，畀一眾老友記將舊衫升級再造，變成獨特日用品，鼓勵佢哋持續學習、接觸新事物。
教羅嘉進同孫玉菡整布袋仔嘅麥婆婆同陳婆婆，喺工作坊入面製作咗獨一無二嘅手織坐墊，同埋用牛仔褲改造嘅圍裙。當日兩個婆婆仲好自豪咁將自己得意之作帶嚟畀羅、孫睇添。