【明報專訊】聽日就係端午節，旅發局下個月6至8日喺尖沙嘴舉辦香港國際龍舟邀請賽，聽日率先喺星光大道舉辦「龍舟美食街」及「Panda Friends@香港海洋公園」端午主題打卡熱點，將會有10個攤檔，售賣端午糉、龍舟豆沙餅等龍舟造型小食；除咗有大熊貓龍鳳胎「加加」、「得得」嘅打卡位，仲設「期間限定店」賣限量紀念品。
一連3日嘅內地端午節假期聽日亦開始，入境處預計約320萬人次進出香港，當中約273萬經各陸路口岸進出，而聽日係陸路出境較繁忙日子，出境人次約57萬；入境高峰期就係周日，入境人次約54萬。
端午內地3日假 料港口岸繁忙
入境處亦估計假期期間羅湖、落馬洲支線及深圳灣管制站會非常繁忙，預計每日平均分別約有23萬、20萬及14萬人次出入境。
