【明報專訊】俗稱「控煙十招」嘅《2025年控煙法例（修訂）條例草案》上月刊憲，隨後立法會成立法案委員會審議，並邀請公眾提交意見書。根據立法會文件，今次有超過800份公眾意見書，數量之多係近年少見。Emily睇過部分意見書，有人批評政府將煙民污名化，令屋企人因為吸煙而被視為「次等公民」，又有人話海關即使打擊私煙，但仲有小販隨處擺賣，建議政府追查源頭。
800幾份意見書入面，Emily留意到支持組織多數來自醫護、教育界等，主要提及健康理由。至於反對方面，除咗部分市民授權煙民組織「煙語知聲」提交意見書，仲有超過65份係來自酒吧業、夜店從業員等，全部以個人名義畀意見。另外仲有超過40份來自內地各省市嘅「在港煙民委員會」，Emily留意到呢批意見書嘅內容幾乎一式一樣，佢哋認為𠵱家嘅禁煙政策太嚴苛，對經濟發展不利，要求恢復進口買賣電子煙，以及提倡「文明吸煙」。
另外有部分反對修例嘅市民就提到自身慘况，包括屋企人因為食煙而被鬧「快點吸到死」等，認為政策係分化市民。
