【明報專訊】律政司長林定國帶隊去西安出席第七屆香港法律服務論壇，今屆主題係一帶一路，佢噚日喺開幕禮致辭時，忽然詩興大發，原來佢同內地開發嘅人工智能DeepSeek「合作」，用「一帶一路」寫咗首藏頭詩：一脈絲路耀古今／帶動陝港破浪行／一心法雨潤新機／路通寰宇利萬民。
噚日活動有超過800人參加，分別來自陝西省、西安市同其他內地城市嘅法律同企業代表，至於香港團就有超過120人，亦係律政司第一次去到西安，喺西北地區舉辦法律論壇，而且規格係歷年最高。
林定國喺會上引述國家主席習近平不時提醒，法治係最好嘅營商環境，又話注意到陝西省近年不斷努力打造市場化、法治化、國際化嘅營商環境，喺建設涉外法治工作取得重大成就，包括舊年8月掛牌成立陝西省司法廳涉外法治工作處，亦建設咗西安「一帶一路」國際商事法律服務示範區。
至於香港，林定國形容香港普通法制度係國際化、高水平、信譽好，佢舉例，舊年香港國際仲裁中心嘅仲裁金額涉1060億元，當事人來自53個管轄區，超過76%係國際仲裁案。