【明報專訊】五豐行同慈善機構「齊惜福」合作嘅首間「齊豐收公益商店」，噚日起喺荃灣過渡房屋「荃福居」正式營業，以較實惠價格供應糧油食品，預計每月惠及5000戶基層家庭。街坊唔止可以喺度買平嘢，「齊惜福」創辦人梁唐青儀話，商店部分營業額會同過渡屋居民「分紅」。
貨品便宜 料每月惠5000戶
梁唐青儀喺開幕禮致辭時話，商店着重公益而非盈利，居民除咗可以買到「平到你笑」嘅健康食品，亦可共享部分營運紅利，並強調「係營業額喎，唔係賺到嘅錢……唔賺都有得分」，期待日後舉辦「分紅」儀式。佢又話未來會舉辦健體操課、健康講座等，盼加強居民幸福感。
除咗過渡屋居民，其他市民都可以幫襯。Emily噚日發現商店即日起至6月10日提供開業限定優惠，例如39蚊一隻鹽焗雞、10.9蚊一罐五豐牌豆豉鯪魚罐頭、13.9蚊一盒湖北蛋、39.9蚊一包5公斤五豐牌香米、51蚊一盒藍罐曲奇、4蚊一個合味道杯麵等，優惠期後價格有可能調整。