【明報專訊】政府日前公布首階段9個旅遊熱點，當中九龍城嘅熱點，即日起喺九龍寨城公園衙門展出「九龍城寨光影之旅」電影場景展，展期3年，免費入場，本月起至8月朝9晚7開放，之後朝9晚6。
1980年代風貌重現3年
呢個以港產片《九龍城寨之圍城》做主題嘅展覽，參觀者將會重返電影場景，例如七記冰室、牙醫診所、魚蛋工場、龍城髮廊及啤膠廠等，呈現1980年代嘅寨城風貌。
展覽亦加入唔少本地傳統工藝元素，例如入口有人手書寫嘅大型花牌，入口上方嘅「九龍城寨」鐵牌坊就參考咗1980年代香港大廈鐵閘嘅設計；展覽內部分地磚更係喺舊建築物回收再用。
啟德機場喺1998年停用前，飛機不時飛過九龍城，展覽就有個「城寨光影天台」，配埋特別聲效，畀參觀者感受飛機喺頭頂飛過嘅聲浪，天台又有大型投影屏幕，展示九龍寨城嘅日與夜。
政府期望以展覽為出發點，配合美食同智慧旅遊等元素，延伸旅客喺九龍城嘅體驗，帶動當區消費。噚日主持開幕禮嘅副政務司長卓永興之後就去衙前塱道同城南道，分別喺潮州雜貨店同泰國雜貨店買咗一堆小食。