【明報專訊】立法會噚日好熱鬧，觀塘啟思幼稚園一批小朋友去咗參觀，當區立法會議員顏汶羽負責接待，同小朋友講古仔及討論「法案」。顏汶羽提出討論小朋友要準時瞓覺，唔少同學話佢哋都喺9點前瞓，但有人就話瞓覺前無刷牙。小朋友經過一番「辯論」後，經投票通過準時瞓覺嘅「法案」，仲話要即日生效，「法案」要求大家9點瞓覺、睡前刷牙及同家人講晚安。顏汶羽就呼籲家長晚上要監察一下小朋友有冇遵守議決喎。
另顏汶羽近日關注區內嘅佐敦谷泳池由4月1日開放至今，約有三分之二面積及設施仍然圍封唔開放，全部都係小朋友嬉水設施，話收到唔少居民反映小朋友嘅嬉水滑梯變成雕塑裝飾，玩水嘅細路同游水嘅成年人一同擠喺泳池內撞來撞去，浪費咗寶貴嘅游泳設施。佢再促請康文署檢視現時救生員嘅嚴重短缺問題，檢視泳池救生員安排嘅標準，話人手不足令全港唔少游泳設施唔開放，令唔少小朋友失望。