【明報專訊】立法會議員可以提出無約束力嘅議員議案，等排隊放上大會辯論，實政圓桌田北辰早前排到提出小學推動人工智能AI教育嘅議案，不過就一波多折。田二少就呻，好不容易排到隊上星期三（7日）辯論，但當日有重要嘅政府法案要通過，包括放寬維港填海限制嘅《2024年保護海港（修訂）條例草案》等，好多議員發言，最終議案要順延至本周三、周四嘅會期，點知噚日立法會主席梁君彥宣布大會提早周三結束，讓路今朝開內會特別會議，討論《維護國家安全條例》附屬法例。
據立法會通知，噚日未完成嘅會議議程會順延至下周三（21日）嘅會期，即理論上，下周三或周四會先討論田二少嘅議案。佢同Emily講自己咁黑仔，為咗個議案做咗好多資料蒐集，稱國家領導人都話人工智能發展好重要，國家及特區政府對人工智能都好重視，所以佢認為應檢討小學課程框架，睇吓各學科能唔能夠應對未來人工智能嘅發展，以及要教學生科技倫理及防範假資訊等。
