【明報專訊】唔少港人對南美國家烏拉圭嘅認識始於足球，烏拉圭攞過世界盃冠軍，近年有球星蘇阿雷斯同曾經來港嘅科蘭，人口唔到香港一半，但足球排名高。烏拉圭駐港總領事館噚日正式成立，總領事拉赫（Federico Lage Cabeza）就拆解箇中原因，話足球喺烏拉圭係全民運動，佢細個都係守門員。
拉赫話，烏拉圭男仔好早接觸足球，好多人都有參與5至11歲兒童嘅足球聯賽，當地叫「baby football」，真係鬥波，唔係興趣班；佢自己當年都參加過聯賽同守龍，講笑咁話唔放心畀其他人守。追溯淵源，佢話英國19世紀喺烏拉圭發展鐵路，將足球文化都傳埋去，當地好專注發展足球，差唔多九成人都踢波或者踢過波。
佢又講笑話，另一個講法解釋點解烏拉圭足球咁勁，係因為當地人食好多牛肉同奶類，身體都強壯啲。