【明報專訊】20世紀初殖民主義興盛，西方列強將視線對準非洲，幾乎瓜分咗成個非洲大陸，但殖民年代前非洲中部更彷彿「被世界遺忘」。城大般哥展覽館即日起舉辦展覽，展出近200件來自19至20世紀早期嘅中非藝術品，包括木製墓地雕像、大型面具、權杖等。策展人之一、香港文化節創辦人趙式慶希望展覽可呈現到中非多元化、富色彩且具靈性嘅藝術文化遺產。
展覽分三大重點展區，展出非洲雕塑、面具同兵器；亦有5件媒體藝術裝置，入場者可以戴上虛擬3D面具，跟住熒幕指示郁動手腳，試跳「面具之舞」，亦可參與沉浸式互動裝置「演武場」，模仿非洲原住民贊德（Zande）武士嘅戰技，Emily睇完示範影片，相信跳完都會出身汗。
展覽至9月28日，免費入場，有興趣市民可網上預約或現場登記入場。