【明報專訊】近年唔少餐飲集團推出軟餐，讓長者或吞嚥困難者重拾飲食樂趣。稻香集團旗下鍾菜館聯同社企推出9款中式軟餐，重點菜式包括八頭南非鮑魚及新鮮西澳龍蝦軟餐，售價由60元至598元不等，並由母親節起喺火炭、灣仔、赤柱、數碼港分店推出，即日起接受預訂，所有菜式會喺接受預訂後嘅宴席日期當日烹調。
鍾菜館推出嘅「同桌同餐吞嚥友善饗宴」共有9款菜式，以經典粵菜及點心為基礎，並依據國際吞嚥障礙飲食標準（IDDSI）改良及微調製法，當中售價最貴、598元嘅大良蛋白炒龍蝦用原隻西澳龍蝦，拆殼起肉，清蒸絞碎後加入牛奶及蛋白輕輕炒熟；售268元嘅「古法扣鮑魚」將八頭南非鮑魚扣燜好後，按軟餐要求打成糊狀再定型，上菜再澆上鮑汁。
社企盼增友善餐膳認識
The Project Futurus及軟餐俠創辦人暨行政總裁文慧妍話，咀嚼及吞嚥困難者喺市面上嘅飲食選擇相當有限，相信今次與稻香集團合作，絕對能夠喺社區及飲食業界帶來更深遠嘅社會影響，提高大眾對吞嚥友善餐膳嘅認識同包容。