【明報專訊】6月喺紅館開棟篤笑嘅美籍華裔荷李活演員歐陽萬成（Jimmy O Yang），3月返過嚟出生地香港，當時佢喺社交網站限時動態更新喺汽水機前買嘢飲，背景就同金鐘政府總部好相似。文體旅局長羅淑佩透過新聞秘書回覆時確認局長當時見過Jimmy，至於傾乜，局方話係討論雙方都有興趣嘅議題。
社交專頁「不專業財經記者」上載Jimmy 3月喺香港更新Instagram限時動態嘅截圖，Jimmy喺汽水機前停低，旁邊見到政府粵港澳大灣區標誌嘅顯示屏，睇落好似政總入面要拍卡先入到嘅電梯大堂。
文體旅局長新聞秘書口頭回覆Emily，當時局長見過Jimmy，又話局長上任幾個月都見過好多唔同範疇嘅人。睇番Jimmy小紅書，當時佢都話嚟香港「睇吓啲朋友、食食嘢，有兩個meeting（會議）啫」。