【明報專訊】律師會理事會早前換屆改選5席理事，全部喺無競爭下自動當選。Emily留意到，其中一個候任新理事係前政務司長張建宗嘅千金張嘉尹（Karen）。另外4人包括連任嘅馬康利（Simon McConnell）、侯百燊同岑顯恆，同埋來自國際大行嘅楊大志。5人任期喺月底律師會會員大會後生效。
Karen本身係大律師出身，之後轉任事務律師，𠵱家係國際律師行合伙人，亦係粵港澳大灣區聯合會副會長，前年兩會後曾以港式普通話接受央視訪問，話相信喺國家主席習近平領導下，大灣區能夠取得亮麗成績。根據律師行網頁，Karen涉足跨境民事訴訟同國際仲裁等，亦向高資產個人及家人提供法律意見等。佢喺選舉宣傳單張提到，作為法律界媽媽一員，好理解身兼母職同業嘅挑戰，希望向身兼母職嘅年輕律師提供更多支持同機會。
前會長彭韻僖陳澤銘全退
另外，兩個律師會前會長彭韻僖（Melissa）同陳澤銘嘅理事任期都夠鐘，兩人無尋求連任，意味兩任前會長正式全退。唔講唔知，Melissa已經做咗20年理事喇。