【明報專訊】首屆「香港非遺月」下個月舉行，主辦嘅康文署非物質文化遺產辦事處話，活動涵蓋粵劇、舞麒麟等超過100個項目。康文署噚日舉行節目簡介會，安排咗3場「非遺」演出，不過表演嘅團體未必同下月演出嘅一樣，但都幾特別、幾精彩。Emily見到演出之一嘅「舞麒麟」，有別於一般嘅「二人四足」，而係「三人六足」，原來呢款來自北區上水圍嘅「六腳麒麟」，係當地村民翻查半個世紀前嘅舊相發現後，再由村務委員會復興而來嘅。
噚日演出嘅「六腳麒麟」由上水鄉鄉公所提供，大埔錦山真心堂國術總會鍾偉泉師傅嘅團隊負責舞動。現場介紹話，「六腳麒麟」嘅披身比一般長，除咗可以畀多一個人舞動，亦可以避免披身舞動期間受損。
香港非遺月以「香港處處有非遺」做主題，5月31日至7月1日舉行，所有活動免費，其中有超過80場非遺表演、60個非遺互動體驗攤位，以及重點項目之一嘅20個「非遺精華遊蹤」導賞團，涵蓋油尖旺、荃灣、大埔、沙田、東區同離島共6區，例如油尖旺嘅行程有蒸籠製作技藝、麻將牌製作技藝等，報名詳情5月16日喺非遺辦網頁公布。