【明報專訊】律政司長林定國最近接受馬會刊物《駿步人生》訪問，講到對香港嘅感情，佢話近年好多人覺得香港面對唔少挑戰，「有時未必樣樣都稱心如意，都有唔開心嘅時候」，最緊要係搵番「留低嘅理由」支持自己喺香港生活，攞番信心同鬥志。
佢又話，相信港人去完旅行後見到香港風景，都會感覺心情舒暢，「不如返屋企食碗雲吞麵或叉燒飯」，「熟悉嘅家人朋友喺度，有自己生活方式，呢個就係好屋企嘅感覺，呢個地方就係應該感覺好舒服，相信大部分香港人都有呢個感覺，就係要攞番呢個感覺」。
工作繁忙嘅林定國喺訪問中話，自己鍾意黎明時分起身跑步，「天黑黑街上無人，感覺好正」，又話鍾意跑步係貪佢無場地同時間限制，令自己思想放空，發下白日夢。佢話公餘想做好多嘢但無時間，若有閒時，第一件事係「瞓到自然醒」，同埋見朋友同去外地旅行，奈何去內地同非洲、再訪南極都只係「奢想」。
30年無諗轉工 獲邀入政府措手不及
佢話3年前獲邀加入政府時「措手不及」，因30年來未諗過轉工，「頂多（諗）做法官」，亦從未喺政府或大機構工作，加入政府後經歷過一段適應期，探索有咩要做，過程中要求自己解說能力到位，畀普羅市民明白法律議題。