【明報專訊】文體旅局長羅淑佩不時親身遊覽香港特色景點，噚日就趁佛誕假期，由灣仔沿維港海濱行去北角。佢話沿途見到唔少市民同旅客，自己亦「偷得浮生、半日自在」，鼓勵大家去海濱發掘一下「香港之美」。
羅淑佩喺facebook分享，噚日出發去長洲主持「搶包山」鳴槍禮前有啲閒暇，決定去維港海濱行下。佢沿途不忘「打卡」，仲上載咗唔少相片，包括參觀已退役嘅「烏蠅頭」列車，經過銅鑼灣怡和午炮時正值中午，拍片記錄開炮一刻。佢以北角東岸板道作終點，特意影低嗰度嘅「提子」塑像，仲遠眺維港對岸嘅啟德體育園同郵輪碼頭。
羅淑佩話噚日陽光普照，海風怡人，不論種族、老幼，以至係寵物，都可以享受寫意閒適嘅維港。佢話五一黃金周期間，外國同內地旅客增幅可觀，尖沙嘴一帶遊人如鯽，強調維港唔止一個觀賞角度，推薦大家得閒的話，都可以去港島嘅海濱走走。
