【明報專訊】文化體育及旅遊局長羅淑佩（Rosanna）日前完成咗阿聯酋同沙特阿拉伯4日訪問，佢噚日喺facebook分享訪問點滴。佢話今次相隔24年後首次再踏足阿拉伯半島，諗起2001年喺卡塔爾首都多哈嘅世貿組織第四次部長級會議，當時佢喺工業貿易署負責世貿談判工作，去咗兩次多哈，有幸親眼見證國家加入世貿歷史一刻。
Rosanna話，作為女性官員，整個行程受到高度尊重照顧，比一啲慣常去嘅國家有過之而無不及，確係意想唔到。會面前佢同其他人員就衣著禮儀等徵詢主人家建議，整個行程只有參觀大清真寺需要覆蓋全身，其他會面著商務服飾就得。佢話風土文化不停咁變，真係要親身體驗，唔可以道聽塗說。
讚當地精英敢於創新
佢又話，今次喺迪拜、阿布扎比同利雅得感受到當地政府和商界強大動力，呢啲地方近年非常願意開放自己、投資建設，概念有時睇嚟異想天開，但落實後成果又令人驚訝。呢幾個地方佢見到官員同商界精英處處展現敢於嘗試和創新精神，不禁令佢想到其實呢啲一直係推動香港發展嘅元素，反問我哋能否進一步激活？
相關字詞﹕羅淑佩