【明報專訊】噚日五一勞動節，明愛荔枝角職工中心舉辦「隱形之光——清潔工日與晚導賞團」，由3個街坊帶參與者游走深水埗大街小巷，了解區內清潔工日常工作嘅挑戰。
兩個月前有段食環署外判清潔工「自貼自清」街招、再影相記錄嘅影片喺網上流傳，當時好多人質疑工友「造假」，導賞團就借呢件事做切入點，向參加者解釋片中工友係忙於其他工作，忘記記錄先會事後補影相，可惜最後演變成警方介入調查，4個工友翌日被炒魷。
導賞員話事件揭示基層工友無議價能力，希望導賞團參加者理解工友處境。佢哋之後帶參加者遊走區內「三無大廈」同後巷，講到三無大廈住客將垃圾棄置街頭、喺後巷休息又驚畀人當「偷懶」等清潔工日常面對嘅難題。主辦方希望今次活動可以喚起大眾關注前線清潔工，一齊建立勞動友善嘅社區氛圍。
